反轉豬肚就係屎呀！

幫左佢手一年，點會話冇感情呀！
佢話唔掂，要遲D先出糧，我都有眼睇，咁大家約定個日子，咪算啦！我都冇迫佢啦！
去完旅行返來，都未見有第一筆數，就梗係追啦！
追喎！話星期一有票，堆到星期三，又拖到星期五，最後，返去下星期一，日子又由頭數過。
打電話又唔聽，只係依賴個會計同佢答！但佢兩個又係一條船！答左都唔知係咪真！
好啦！到佢係聽我電話，或者答下我MSN，就係話我知傾緊，遲些覆我！
一日堆一日！成2個月都有啦！

到今個星期一，佢聽我電話啦！話預備好D票架啦！但個刻唔得閒，要過一陣先同我講詳情。
個一陣，足足有兩日啦！到而家星期三，個詳情都未寫好呀！或是個大話未作好！
有票啦！要話我知每張票的數字和入票日期有幾難姐！
講極都講唔到，咪即係又係耍我啦！
我都唔係冇見過佢點耍D廠啦！
唉！係估唔到，有朝一日，到我自己俾人耍姐！

好啦！打俾會計問啦！就話我知全數星期五入，都係拖字訣架啦！
但我真係好WORRY啦！
咪又打個電話去問會計，係咪真係有票，或是耍我啦！
小姐的回覆係，"都話有啦！我都同你追左老闆個答覆係咁，咁你咪等星期五啦！否則，你都上左勞工署啦，有咩擔心呀！"
哈！係架！係架！我都上左勞工署啦！我有咩好擔心！連被告個方都唔擔心，我都真係唔使擔心！因為擔心都係多舊魚，事實放在眼前啦！

舊錢，就一定要攞返，但都補唔返我的心傷，神傷和浪費左的時間。

對人，心淡啦！你對人好，人地對得你更"好"！
點都係你死好過我死啦！
正所謂,"反轉豬肚就係屎"呀！